SPAZIO FIUME
GIULIO SCALA
Mia mama, Piera Vernier Scala
L'affettuoso ricordo di una popolare ostetrica fiumana
Mi scrivo sempre quel che me capita, intela vita de ogni giorno, qua in Veneto Orientale, sperando con ste ciacole, de tegnirve un poco de compagnia.
Presempio, venerdì dopopranzo son andado con mia molje a portarghe fiori a la molje del nostro amico Toni, che ghe xe nato un picio in Ospidal. Sto ospidal xe novo. Se vederii che bel. Tuto vetri e tuto lustro, che par no un ospidal del Comun, ma una Clinica privata de quele che indove che in television i fa le Telenovele/teleromanzi dei dotori. Leto letrico che se fraca un boton e el va su e zo, aria condizionata (anche de inverno), infermiere tute bele e eleganti, insomma, una roba proprio mericana, de lusso.
A mi me xe vegnudo inamente la mia mama, che essa la era levatrice a Fiume.
Prima, dal 1926 al 1936, diezi ani in Ospedal Civile del Santo Spirito (ex Academia Naval de la Marina Ungarese) in ultimo pian, in "maternità", e dopo, anche durante la guera, fin al 1946, la era libera professionista, lavorando privatamente. Mi credo che la gabi "rilevado" (come se diseva una volta) un per de generazioni de fiumani.
Bionda, alta, magra e assai energica, essa la era sempre in movimento, sempre reperibile in tute le ore del giorno e dela note (chissà perchè i fioi i nassi squasi sempre de note?).
La coreva per sta Fiume, anche de inverno, de note, col fredo e cola bora che sufiava e no la gaveva paura de andar in giro, sola, per andar a far nasser un picio fiuman, gnanche durante la guera, col coprifogo e cole ronde dela Feldgendarmerie tedesca e, dopo, cole patulje dela milizia jugoslava.
Come tanti de noi fiumani, essa la parlava ben per todesco e la se rangiava col crovato. Se la familja la era "benestante" e la abitava intei "quartieri alti", presempio in via Donatello, alora la mia mama la ghe mandava dopo la sua "parcella". Se nasseva un picio in una sufita de Zitavecia, da povara gente, la fazeva tuto senza domandarghe una lira, anzi, mi me ricordo che la ghe portava de regalo panuze e altra roba che ghe ocoreva ala mama e al picio.
Una santa dona, la mia mama!
Quando semo andadi via de Fiume, nel quarantasei, a mi i me gaveva ciolto intel Colegio "Niccolò Tommaseo", a Brindisi (che fame, muli!) e la mia mama, essa la gaveva trovado, tramite la famiglia Masé, sui clienti a Fiume, indove che i gaveva due salumerie (una granda in Piazza Regina Elena, sul canton via Carducci, via Ciotta), un posto de levatrice in una "condotta" del montagna, indove penso che nissun voleva andar, in un picio paeseto de la Alta Val Cembra, a 1700 metri, cole stradete tute in piover, con 120 abitanti, comprese le cavre e le armente.
Anche là i era proprio povari, ma cussì povari, che i gaveva solo un poco de tera, piena de grebeni e de gromaze, e i omini andava lavorar in Svizera.
De inverno, con due o tre metri de neve, la mia mama la doveva andar anche assister una partoriente in qualche "maso" isolado in montagna, a due o tre ore a piedi dal paese. Per andar suso, de note, per zerti sentieri jazadi, la se doveva meter soto dei scarponi, i "rampini" per el jazo (in Trentino i li ciama "carpelle").
Tuti, anche là, i ghe voleva 'sai ben, e anche se no i gaveva bori i ghe portava ovi, miel, speck e butiro.
Una volta era nato un bambin asfitico, tutto blu e no 'l respirava. I voleva già meterlo in una scatola de scarpe, de carton, soto el leto e bonanote... La mia mama, esa la se ga fato portar due mastele, una de aqua calda e una de aqua freda, e la ga scominziado la tociar sta povara cratura in aqua freda e in aqua calda, per meter in moto la zircolazion. Dopo un poco el picio el ga tacà frignar a tuta forza. La gente zigava "miracolo, miracolo...".
De quela volta la mia mama la gaveva, in sti paesi, la fama de santa, e tuti i ghe basava le mani.
El fato era che prima che essa la rivassi de quele parti (la mia mama la se gaveva diplomado ala Scuola di Ostetricia dela Università de Padova), i gaveva una vecia "mamana" che la fazeva tuto solo per pratica antica, e quando che un fio el nasseva "Morto" (asfittico)... era destino!
Quando che mi go finido la scola, a Brindisi, son stado anche mi un due inverni in sto paese, che 'l se ciamava "Piscine di Sovèr", indove che finiva la strada e che, quando che era assai neve, no veniva gnanche la corriera. Adesso se pasa de là cola nova strada asfaltada, per andar de Trento a Cavalese, in Val di Fiemme.
Mi ero grande amico del parroco, don Lorenzo e, sicome che lui el sonava ben la chitara, e mi quela volta sonavo la fisarmonica, quando che de un contadin era batezo o sposalizio, alora noi due fazevimo grande sonade e grande magnade de polenta e luganighe con bicerini (e biceri) de grapa, che i la distilava in bosco, de contrabando.
***
Dopo se gavemo trasferido a Genova, e la mia mama, senza più lavor, che per essa el era stado tuta la vita più una mision che un lavor, no la se gaveva mai ambientado coi genovesi, che i parlava un dialeto che per essa era foresto e no la lo capiva.
La xe morta nel mile novezento sessanta oto, de embolia, dopo de una operazion, ma mi credo anche de tristeza, lontan de la sua Fiume.
Mi go pensado che sarìa stado assai bel ricordarse una volta de sta dona, che in vita sua la ga fato tanto del ben e che la xe morta sentindose - come tanti de noi fiumani in esilio - "straniera in patria".
Giulio Scala
Tratto da: "La Tore". Foglio della Comunità degli italiani di Fiume. n.s. n. 12 (2002), p. 60-61.
Odori e profumi che aveva Fiume
Mia mama, Piera Vernier Scala
F I N E